ໃນການເຂົ້າໃຊ້ອິນເຕີເນັດ, ຂ້າພະເຈົ້າໄດ້ພະຍາຍາມຊອກຫາເວັບໄຊລາວຕ່າງໆ
ແລະໄດ້ລອງເຂົ້າໄປຢ້ຽມເບີ່ງເວັບໄຊນັ້ນໆ ເພື່ອໃຫ້ຮູ້ວ່າແມ່ນເວັບທີ່ມີເນື້ອຫາສາລະປະເພດໃດ,
ຂຽນເປັນພາສາໃດ, ແລະອື່ນໆ. ຂ້າພະເຈົ້າຄຶດວ່າ ບັນດາທ່ານອາດມີຄວາມສົນໃຈຢາກຮູ້ຈັກເວັບເຫຼົ່ານັ້ນ
ແຕ່ບໍ່ຮູ້ທີ່ຢູ່ທີ່ກ່ຽວຂ້ອງ. ດັ່ງນັ້ນ, ຂ້າພະເຈົ້າຈຶ່ງທໍາການຮວບຮວມ
ທີ່ຢູ່ຂອງເວັບນັ້ນ ພ້ອມທັງລາຍລະອຽດບາງປະການ ຕາມຄວາມຮູ້ສຶກ
ພາຍຫຼັງທີ່ໄດ້ເຂົ້າໄປຢ້ຽມຊົມເວັບນັ້ນໆມາ. ໃນປັດຈຸບັນນີ້,
ລາຍຊື່ເວັບອາດຈະຍັງບໍ່ທັນຄົບຖ້ວນ, ຂ້າພະເຈົ້າຈະພະຍາຍາມ
ທະຍອຍນໍາສະເໜີໃຫ້ໄດ້ຫຼາຍທີ່ສຸດເທົ່າທີ່ຈະເປັນໄປໄດ້.
ຂ້າພະເຈົ້າໄດ້ຈັດເວັບໄຊເຫຼົ່ານີ້ອອກເປັນ 3 ປະເພດຄື: 1. ເວັບໄຊອົງກອນຂອງລັດຖະບານ,
2. ເວັບໄຊເອກະຊົນລາວ ແລະ 3. ເວັບໄຊພາສາລາວແຕ່ບໍ່ແມ່ນຂອງຄົນລາວ.
ຖ້າຂໍ້ມູນທີ່ຂ້າພະເຈົ້ານໍາສະເໜີມີອັນຄາດເຄື່ອນ/ບໍ່ຖືກຕ້ອງ
ຫຼືເຂົ້າໃຈຜິດພາດໃນບາງປະເດັນ, ຂໍໃຫ້ທ່ານຜູ້ຮູ້ ຫຼືພາກສ່ວນທີ່ກ່ຽວຂ້ອງ
ສົ່ງອີເມແຈ້ງມາທາງຂ້າພະເຈົ້າ ເພື່ອຈະໄດ້ທໍາການແກ້ໄຂດັດແປງໃຫ້
(ຖ້າເປັນໄປໄດ້, ກະລຸນາຂຽນເປັນພາສາລາວ - ທີ່ຢູ່ອີເມຂອງຂ້າພະເຈົ້າຢູ່ໜ້າເວັບທໍາອິດ).
1. ເວັບໄຊອົງກອນຂອງລັດຖະບານ
ໝາຍເຫດ: ຖ້າທ່ານມີໂອກາດໄປຢ້ຽມຢາມເວັບໄຊເຫຼົ່ານີ້,
ຖ້າເປັນໄປໄດ້, ກະລຸນາຂຽນຄໍາຄຶດຄໍາເຫັນ, ຄໍາແນະນໍາ
ຫຼືຂໍ້ຕໍານິ-ຕິຊົມ ສົ່ງຫາຜູ້ດູແລເວັບໄຊນັ້ນໆ ຕາມທີ່ຢູ່ທີ່ໃຫ້ໄວ້ໃນເວັບໄຊ
ເພື່ອເປັນການໃຫ້ກໍາລັງໃຈ ຫຼືກະຕຸ້ນໃຫ້ມີການພັດທະນາເວັບໄຊໃຫ້ດີຂື້ນ,
ສາມາດຕອບສະໜອງຄວາມຕ້ອງການຂອງຜູ້ມາຢ້ຽມຊົມ ໃຫ້ໄດ້ໃນລະດັບໃດໜຶ່ງ.
ສ່ວນໃຫຍ່ແລ້ວ, ບໍ່ຄ່ອຍມີຜູ້ສົ່ງເມຫາຜູ້ດູແລເວັບໄຊ ຊຶ່ງເປັນສາເຫດໃຫ້ຜູ້ດູແລເວັບເຂົ້າໃຈວ່າ
ບໍ່ມີຄົນເຂົ້າມາຢ້ຽມເວັບ ຈຶ່ງບໍ່ມີຄວາມກະຕືລືລົ້ນທີ່ຈະປັບປຸງເວັບໄຊໃຫ້ມີຂໍ້ມູນ
ທີ່ທັນກັບສະພາບການ ຫຼືປັບປຸງເພີ່ມເຕີມແຕ່ປະການໃດ. ຖ້າທ່ານລໍາບາກໃຈທີ່ຈະຂຽນເມເປັນພາສາອັງກິດ,
ທ່ານສາມາດຂຽນເປັນພາສາລາວກໍ່ໄດ້.
ເວັບໄຊ
|
ລາຍລະອຽດບາງປະການ
|
http://www.stea.gov.la
|
ເວັບໄຊຂອງອົງການວິທະຍາສາດ,
ເຕັກໂນໂລຊີ ແລະສິ່ງແວດລ້ອມ ທີ່ມີຖານະທຽບເທົ່າກັບກະຊວງ;
ຂື້ນໂດຍກົງກັບສໍານັກນາຍົກລັດຖະມົນຕີ. ມີການປັບປຸງໃໝ່
ຈາກເມື່ອກ່ອນທີ່ຂຽນເປັນພາສາອັງກິດລ້ວນໆ ໃຫ້ມີໜ້າເວັບພາສາລາວ
ເພີ່ມອີກໜຶ່ງພາສາ. ເວັບໄຊນີ້ ຫາກໍ່ສາມາດເຂົ້າໄປຢ້ຽມຊົມໄດ້
ເມື່ອຕອນແລງຂອງວັນທີ່ 06/02/2004 ນີ້ເອງ ເພາະ Server ທີ່ຮັບຝາກເວັບໄຊນີ້ຕິດຂັດເປັນເວລາຫຼາຍມື້.
ເນຶ້ອໃນ ໃນຂະນະນີ້ ມີພຽງແຕ່ ພິທີເປີດໂຄງການເຊື່ອມຕໍ່ອິນເຕີເນັດລາວ-ໄທ
ເທົ່ານັ້ນ. ທ່ານທີ່ມີຟອນນະຣິນຢູ່ແລ້ວ, ສາມາດອ່ານພາສາລາວໄດ້ເລີຍ.
ໜ້າເວັບພາສາລາວໃນເວັບໄຊນີ້ ມີຈຸດດີຢູ່ບ່ອນວ່າ ບໍ່ຂື້ນກັບ
Encoding (ໝາຍຄວາມວ່າ ຈະປັບ Encoding ເປັນຂອງພາສາໃດກໍ່ຕາມ
ກໍ່ຍັງເຫັນເປັນພາສາລາວຢູ່); ສ່ວນຈຸດອ່ອນແມ່ນ ມີການຕັດຂໍ້ຄວາມລົງໄປແຖວໃໝ່
ທັງທີ່ມີບ່ອນເຫຼືອທ້າຍແຖວເຫຼືອເຟືອ. ຢ່າງໃດກໍ່ຕາມ, ຂໍເປັນກໍາລັງໃຈ
ໃຫ້ຄະນະຈັດທໍາ ສາມາດບຸກບືນ ສ້າງເວັບໄຊນີ້ ໃຫ້ສົມກັບເປັນເວັບຂອງອົງກອນ
ທີ່ເປັນຕົວແທນຂອງວິທະຍາສາດ ແລະເຕັກໂນໂລຊີຂອງຊາດ.
06/02/04
|
http://www.moc.gov.la
|
ເວັບໄຊຂອງກະຊວງການຄ້າ.
ທີ່ຢູ່ເວັບໄຊແມ່ນ http://www.moc.gov.la/ ແຕ່ຜັດໄປພົ້ນອອກຢູ່
http://www.mot.gov.vn/laowebsite/. ຫວັງວ່າ ການໄປຝາກເວັບໄຊ
ນໍາເວັບໄຊພາກສ່ວນອື່ນ ຄົງມີລັກສະນະຊົ່ວຄາວ, ບໍ່ດັ່ງນັ້ນ,
ການປັບປຸງໜ້າເວັບໃຫ້ທັນສະພາບ ຄົງບໍ່ໄດ້ດັ່ງໃຈ ຫຼືທັນໃຈແນ່ນອນ.
ມີການປ່ຽນແປງຮູບໂສມຂອງເວັບໄຊ ນັບຕັ້ງແຕ່ມີເຈົ້າກະຊວງຄົນໃໝ່.
ຂຽນເປັນພາສາອັງກິດລ້ວນໆ. ສິ່ງທີ່ໜ້າສົນໃຈໃນເວັບໄຊນີ້,
ຄົງຈະແມ່ນ ສະຖິຕິທາງດ້ານການຄ້າ (Trade Statistics), ລາຄາໃນທ້ອງຕະຫຼາດ
(Market Prices) ແລະ ຕະຫຼາດນັດ-ການວາງສະແດງຕ່າງໆ (Fairs and
Exhibitions). ໜ້າເສຍດາຍທີ່ ໜ້າລາຄາໃນທ້ອງຕະຫຼາດ ບໍ່ມີຂໍ້ມູນໃດໆເລີຍ;
ສ່ວນໜ້າ ຕະຫຼາດນັດ ແລະການວາງສະແດງຕ່າງໆ ກໍ່ມີພຽງຂໍ້ມູນພື້ນຖານຂອງຕະຫຼາດນັດ
ແລະການວາງສະແດງຕ່າງໆ ທີ່ຜ່ານມາ ແລະໃນຕໍ່ໆໜ້າເທົ່ານັ້ນ.
06/02/04
|
http://www.vientianetimes.org.la
|
ເວັບໄຊສໍານັກພິມວຽງຈັນໄທມສ໌
(ຂອງແທ້), ອົງກອນໜຶ່ງທີ່ສັງກັດກະຊວງຖະແຫຼງຂ່າວ ແລະວັດທະນະທໍາ,
ມີໜ້າທີ່ໃນການ ພິມຈໍາໜ່າຍໜັງສືພິມເປັນພາສາອັງກິດ. ເປັນເວັບໄຊຂ່າວລາວ
ທີ່ນໍາສະເໜີເປັນພາສາອັງກິດລ້ວນໆ. ເລີ່ມແຕ່ທ້າຍເດືອນ
ມັງກອນ 2004 ເປັນຕົ້ນມາ, ເວັບໄຊນີ້ ອອກຂ່າວໃໝ່ເປັນລາຍວັນ
ສໍາລັບມື້ເຮັດການ (ຈັນ-ສຸກ). ຖືໄດ້ວ່າ ເປັນເວັບໄຊຂ່າວຂອງລາວ
ທີ່ເນື້ອໃນ ມີການປັບປຸງ ໄວກ່ວາເວັບໄຊລາວອື່ນໆ. ຍ້ອນເນື້ອໃນຂ່າວ
ແມ່ນຖອດມາຈາກໜັງສືພິມ ແລະເວລາແກ່ຍາວໄປພໍສົມຄວນ ກ່ອນທີ່ຂ່າວໃໝ່
ຈະຖືກອັບໂຫຼດຂື້ນໄປໄວ້ເທີງອິນເຕີເນັດ, ດັ່ງນັ້ນ ຂ່າວໃໝ່ລ່າສຸດ
ຈຶ່ງເປັນເຫດການທີ່ບໍ່ຕໍ່າກ່ວາ 36 ຊມ (ມື້ເຄີ່ງ!). ມີຄວາມເປັນໄປໄດ້
ທີ່ຈະເຮັດໃຫ້ຊ່ວງເວລາດັ່ງກ່າວ ຫຼຸດລົງເປັນ 12 ຫຼື 6 ຊມ.
ຄຶດວ່າ ຄົງບໍ່ເກີນຄວາມສາມາດຂອງຄະນະຈັດທໍາເວັບນີ້!
06/02/04
|
http://www.kplnet.net
|
ເວັບໄຊຂອງສໍານັກຂ່າວສານປະເທດລາວ,
ອົງກອນໜຶ່ງຂອງກະຊວງຖະແຫຼງຂ່າວ ແລະວັດທະນະທໍາ ແລະປາກກະບອກສຽງຂະໜານແທ້
ແລະດັ້ງເດີມຂອງລັດຖະບານ. ແມ່ນເວັບໄຊຂ່າວທີ່ນໍາສະເໜີທັງພາສາອັງກິດ,
ຝຣັ່ງ ແລະພາສາລາວ (ພາກພາສາລາວຕ້ອງມີ Acrobat Reader 4 ຂຶ້ນໄປ
ແລະຕ້ອງໃຊ້ IE; ຖ້າບໍ່ເຫັນເປັນໂຕລາວ, ໃຫ້ອົດໃຈລໍຖ້າຈົນກ່ວາຈະໂຫຼດສໍາເລັດ,
ໂຕລາວຈະຂື້ນມາແທນໂຕອັກສອນສັນຍາລັກເອງ - ຖ້າໃຊ້ Mozilla
1.4, ຕ້ອງດາວໂຫຼດໄປກ່ອນ ແລ້ວຈຶ່ງຈະເປີດອ່ານໄດ້). ຂ່າວສານປະເທດລາວ
ເປັນຂ່າວປະຈໍາວັນ, ແຕ່ທີ່ນໍາມາລົງໃນເວັບໄຊນີ້ ຈະມີວັນທີ
ທີ່ຊ້າກ່ວາ ວັນທີປັດຈຸບັນ 2 ມື້ເປັນຢ່າງຕໍ່າສໍາລັບພາກພາສາລາວ
ແລະເກືອບ 1 ມື້ສໍາລັບພາສາຝຣັ່ງ ແລະອັງກິດ. ນອກຈາກນັ້ນ, ເນື້ອໃນຂ່າວທີ່ເປັນພາສາຝຣັ່ງ
ຈະມີໜ້ອຍກ່ວາພາສາອັງກິດ. ການເຊື່ອມຕໍ່ຈໍານວນໜຶ່ງ ກໍ່ໃຊ້ການບໍ່ໄດ້
ເພາະຊອກຫາໄຟລ໌ທີ່ກ່ຽວຂ້ອງບໍ່ເຫັນ.
22/07/03
|
http://www.na.gov.la/ ຫຼື http://203.162.21.40/homepage/
lao/vpqh/
|
ເວັບໄຊຂອງອົງການນິຕິບັນຍັດສູງສຸດຂອງປະເທດ
- ສະພາແຫ່ງຊາດ. ຂຽນເປັນສອງພາສາຄື ອັງກິດ ແລະລາວ
ແຕ່ພາສາລາວຈະມີບັນຫາໃນການສະແດງຜົນເທີງເວັບ (ຕົວ ນ ຫາຍ!)
ຖ້າໃຊ້ຕົວທ່ອງເວັບ ໃຫຍ່ກ່ວາ IE4 ແລະ Netscape3. ຖືໄດ້ວ່າ ລະບົບພາສາລາວທີ່ໃຊ້ຍັງຫຼ້າຫຼັງຢູ່.
ເນື້ອຫາທີ່ນໍາມາສະເໜີ ປະກອບດ້ວຍ: ປະຫວັດຫຍໍ້ຂອງປະເທດລາວ
ແລະສະພາແຫ່ງຊາດ, ລັດຖະທໍາມະນູນຂອງ ສ.ປ.ປ. ລາວ, ບົດບາດ-ໜ້າທີ່-ການເຄື່ອນໄຫວຂອງສະພາແຫ່ງຊາດ
ແລະອື່ນໆທີ່ກ່ຽວຂ້ອງຈໍານວນໜຶ່ງ.
|
http://www.mofa.gov.la/
|
ເວັບໄຊຂອງກະຊວງການຕ່າງປະເທດ.
ເປັນພາສາອັງກິດເທົ່ານັ້ນ. ເນື້ອຫາສ່ວນໃຫຍ່ປະກອບດ້ວຍຂ່າວຄາວ
ແລະຂໍ້ຕົກລົງຂອງກະຊວງ ຊຶ່ງເກົ່າແກ່ບໍ່ຕໍ່າກ່ວາ 2 ປີ. ຖ້າທ່ານຢາກຮູ້ວ່າ
ສ.ປ.ປ. ລາວ ມີສາຍສໍາພັນດ້ານການທູດກັບປະເທດໃດແດ່
ແລະມີອົງການຈັດຕັ້ງສາກົນໃດແດ່ໃນ ສ.ປ.ປ. ລາວ, ເວັບໄຊນີ້
ສາມາດໃຫ້ຄໍາຕອບແກ່ທ່ານໄດ້. ສິ່ງທີ່ໜ້າສົນໃຈຂອງເວັບນີ້
ຄົງຈະແມ່ນຂໍ້ມູນກ່ຽວກັບການຂໍວີຊາເຂົ້າ ສ.ປ.ປ. ລາວ ຊຶ່ງສາມາດເບີ່ງໄດ້ຈາກ
Consular Information.
22/05/03
|
http://www.nuol.edu.la/
|
ເວັບໄຊທາງການ ຂອງມະຫາວິທະຍາໄລແຫ່ງຊາດ.
ເລີ່ມອອກເຜີຍແຜ່ທາງອິນເຕີເນັດ ແຕ່ທ້າຍປີ 2003 ໂດຍທີ່ ມຊ
(ມະຫາວິທະຍາໄລແຫ່ງຊາດ) ດູແລ ແລະຄຸ້ມຄອງດ້ວຍຕົນເອງ (ຂໍ້ຄວາມນ້ອຍໆທີ່ວ່າ
since May 2003 ຄົງບໍ່ໄດ້ໝາຍເຖີງຊ່ວງເວລາທໍາອິດທີ່ອອກເຜີຍແຜ່ທາງອິນເຕີເນັດ?!).
ປັດຈຸບັນ, ໜ້າເວັບສ່ວນໃຫຍ່ ແມ່ນເປັນພາສາອັງກິດ;
ມີແຕ່ໜ້າເວັບຂອງສູນລາວ-ຍີ່ປຸ່ນ 1 ໜ້າ ທີ່ເປັນພາສາລາວ. ເວັບໄຊນີ້
ຍັງສ້າງບໍ່ທັນສົມບູນເທື່ອ ເພາະຍັງມີຫຼາຍສິ່ງທີ່ຕ້ອງປັບປຸງ/ຂະຫຍາຍ
ໂດຍສະເພາະໜ້າເວັບທີ່ເປັນພາສາລາວ. ການປັບປຸງ/ຂະຫຍາຍແມ່ນເຮັດໄດ້ຊ້າ
ເຖີງວ່າ ມຊ ຈະຄວບຄຸມ-ດູແລເວັບໄຊນີ້ດ້ວຍຕົນເອງ: ການທົບທວນຄືນ
ນະໂຍບາຍທາງດ້ານການຄວບຄຸມ-ກວດກາ, ການໃຫ້ສິດແກ່ພາກສ່ວນຕ່າງໆ
ໃນການປັບປຸງ/ຂະຫຍາຍໜ້າເວັບຂອງເຂົາເຈົ້າ ດ້ວຍຕົວຂອງເຂົາເຈົ້າເອງ
ຈະເຮັດໃຫ້ເວັບໄຊນີ້ ມີການເໜັງຕິງ ແລະຈະຊ່ອຍກະຕຸ້ນໃຫ້ພາກສ່ວນຕ່າງໆ
ປະກອບສ່ວນສ້າງເວັບໄຊນີ້ ໃຫ້ເປັນສື່ທີ່ມີປະສິທິຜົນ ໃນການປະຊາສໍາພັນ
ຫຼືເປັນເຄື່ອງມືສົມທົບ ໃນການຮຽນ-ການສອນ ຂອງ ມຊ.
|
http://www.laoembassy.com/
|
ເວັບໄຊຂອງສະຖານທູດລາວ
ປະຈໍາສະຫະລັດອະເມລິກາ. ອາດຖືໄດ້ວ່າ ແມ່ນເວັບໄຊອົງກອນຂອງລັດຖະບານເວັບທໍາອິດ.
ຂື້ນກັບກະຊວງການຕ່າງປະເທດ ແລະເປັນ 1 ໃນ ຫຼາຍໆ ສະຖານທູດລາວ
ທີ່ມີເວັບໄຊເປັນຂອງຕົນເອງ. ເປັນພາສາອັງກິດລ້ວນໆ. ມີບົດສະເໜີກ່ຽວກັບປະເທດລາວ,
ກະຊວງການຕ່າງປະເທດ ແລະຜູ້ນໍາລາວຈໍານວນໜຶ່ງ. ນອກຈາກນັ້ນ,
ຍັງມີຂ່າວ ແລະຂ່າວສານຂໍ້ມູນຕ່າງໆກ່ຽວກັບປະເທດລາວ.
23/07/03
|
http://www.mekongcenter.com/
home.htm
|
ເວັບໄຊອົງການທ່ອງທ່ຽວແຫ່ງຊາດ,
ເປັນພາສາອັງກິດ. ເປົ້າໝາຍຫຼັກເພື່ອສົ່ງເສີມການທ່ອງທ່ຽວໃນລາວ
ດ້ວຍການນໍາສະເໜີ ແຫຼ່ງທ່ອງທ່ຽວທ່າແຮງຕ່າງໆ (potential tourist
sites), ໂດຍເນັ້ນໄປທາງດ້ານປະເພນີ-ຂະນົບທໍານຽມ-ວັດທະນະທໍາລາວ
ທີ່ຍັງຮັກສາຄວາມເປັນເອກະລັກ ແລະດັ້ງເດີມ (Identity and
Originality)ໄວ້ ໃນສະພາບທີ່ແຫຼ່ງທ່ອງທ່ຽວອື່ນໆໃນໂລກ ໄດ້ຮັບຜົນສະທ້ອນຈາກການປ່ຽນແປງ
ໄປຕາມກະແສໂລກາພິວັດ (Globalization). ນອກຈາກນີ້, ຍັງມີໜ້າເວັບຍ່ອຍທີ່ຈະນໍາທ່ານໄປຮູ້ຈັກກັບແຫຼ່ງບູຮານະສະ
ຖານ (Archeology), ແຫຼ່ງຊົນຊາດຊົນເຜົ່າ, ແຫຼ່ງມໍລະດົກແຫ່ງຊາດ
ແລະອື່ນໆ. ພ້ອມກັນນີ້, ຍັງມີຂ່າວສານຂໍ້ມູນກ່ຽວກັບບໍລິສັດນໍາທ່ຽວ,
ໂຮງແຮມ-ບ້ານພັກ, ຮ້ານອາຫານ ແລະອື່ນໆ.
26/07/03
|
http://www.bkklaoembassy.com/
|
ເວັບໄຊສະຖານທູດລາວປະຈໍາປະເທດໄທ
- ເວັບໄຊສະຖານທູດລາວແຫ່ງທີສອງ ທີ່ຂື້ນກັບກະຊວງການຕ່າງປະເທດ.
ເປັນພາສາອັງກິດ ແຕ່ມີພາສາໄທໜ້າດຽວໃນໜ້າ "ຂໍ້ມູນກ່ຽວກັບປະເທດລາວໂດຍສັງເຂບ".
ໃນສ່ວນທີ່ເປັນພາສາອັງກິດ, ມີຂ່າວສານຂໍ້ມູນກ່ຽວກັບ
ປະເທດລາວ, ລັດຖະບານ, ລັດຖະທໍາມະນູນ, ການຄ້າ ແລະການລົງທຶນ,
ຄວາມສໍາພັນລາວ-ໄທ ແລະຂ່າວຄາວຕ່າງໆ. ນອກຈາກນີ້ຍັງມີຂໍ້ມູນກ່ຽວກັບການຂໍວີຊາເຂົ້າປະເທດລາວ
ແລະແຜນທີ່ ທີ່ຕັ້ງຂອງສະຖານທູດ. ໜ້າສັງເກດວ່າ ບໍ່ມີຂໍ້ມູນກ່ຽວກັບສະຖານກົງສູນລາວ
ທີ່ຢູ່ຂອນແກ່ນ ແລະຊຽງໃໝ່ ແຕ່ປະການໃດ ?! (ບໍ່ແນ່ໃຈວ່າ
ສະຖານທີ່ຖືກຕ້ອງຫຼືບໍ່, ຫຼືວ່າໄດ້ຍົກເລີກໄປແລ້ວ?!).
26/07/03
|
http://www.un.int/lao/
|
ເວັບໄຊຫ້ອງການຜູ້ຕາງໜ້າລາວປະຈໍາສະຫະປະຊາຊາດ
- ສັງກັດກະຊວງການຕ່າງປະເທດ. ເປັນພາສາອັງກີດທັງໝົດ
(ຍົກເວັ້ນຂໍ້ຄວາມ "ສາທາລະນະລັດ ປະຊາທິປະໄຕ ປະຊາຊົນລາວ"
ໃນໜ້າເວັບທໍາອິດ). ສິ່ງທີ່ນໍາສະເໜີມີ: ຂໍ້ມູນກ່ຽວກັບ
ປະເທດລາວ, ລັດຖະບານ ແລະກະຊວງການຕ່າງປະເທດ. ນອກຈາກນີ້ຍັງມີ
ການນໍາສະເໜີກ່ຽວກັບກິດຈະກໍາການເຄື່ອນໄຫວຕ່າງໆ ຂອງຫ້ອງການຜູ້ຕາງໜ້າລາວປະຈໍາສະຫະປະຊາຊາດ.
ສິ່ງທີ່ໜ້າສົນໃຈຂອງເວັບໄຊນີ້ ຄົງຈະເປັນໜ້າຫ້ອງຂ່າວ
ທີ່ນໍາສະເໜີເອກະສານທາງການ ທີ່ໜ້າສົນໃຈໃນປະເດັນຕ່າງໆຈໍານວນໜຶ່ງ.
26/07/03
|
|
ຍັງມີຕໍ່. ກະລຸນາມາຢ້ຽມຊົມຕື່ມໃນໂອກາດໜ້າ. |
|
|
|
|
|
|
|
|
|
|
|
|
|
|
|